Garðabær er ungt bæjarfélag, fékk kaupstaðarréttindi 1. Janúar 1976 og voru íbúar þá 4.200 en um síðustu áramót voru þeir 7.800. Árið 1960 var Garðakauptún . lögilt sem verslunarstaður og voru íbúar þá um 730, byggðin hefur því vaxið hratt. Upphaf búsetu í landi Garðabæjar má rekja allt aftur til landnámstíðar, í Landnámabók er getið tveggja jarða innan núverandi bæjarmarka, Skúlastaða og Vífilstaða. Talið er að Skúlastaðir hafi annað hvort verið þar sem nú er kirkjustaðurinn Garðar eða að Bessastöðum.

Þrátt fyrir hraða þróunn byggðarinnar býður Garðabær íbúum sínum þjónustu til jafns við það sem hún gerist annars staðar. Íbúar Garðabæjar og gestum þeirra gefst nú kostur á að afla sér upplýsinga um þjónustu bæjarins á Veraldarvefnum. Þeir sem skoða síður Garðabæjar á Ferðanetinu komast að því að í bænum má njóta fjölbreyttrar þjónustu á sviði tómstundar og dægrardvalar og oftar en ekki útivistar og fagurrar náttúru.

Íþróttamiðstöðin Ásgarður er eitt af stærstu og glæsilegustu íþróttamannvirkjun á landinu. Húsnæði Ásgarðs er einnig heppilegt til margra annarra nota en íþróttaiðkunar t.d. sýningahald, ráðstefnur og þing. Aðal íþróttavellir bæjarins eru við Ásgarð. Sundlaugin okkar er mjög góð, með barnalaug, rennibraut gufuböðum sólarlömpum ofl.

Göngu og skokkleiðir í ósnortinni náttúru eru óvíða í þéttbýli jafn skamman spöl frá byggð og í Garðabæ. Gálgahraun, Heiðmörk og Reykjanesfólkvangur eru kjörin útivistarsvæði til gönguferða og náttúruskoðunnar. Reiðleiðir liggja frá svæði hestamanna á Kjóavöllum og tengjast leiðum frá hesthúsasvæðum í Hafnarfirði, Kópavogi og Reykjavík. Stangveiði, golf og siglingar er einnig meðal þess sem í boði er í Garðabæ.

Land Garðabæjar er mjög fjölbreytt og setja vötn, lækir, hraun, og fjara svip sinn á byggðina. Bærinn hefur gengist fyrir uppgræðslu og gróðursetningu á opnum svæðum og í íbúðahverfum svo og frágangi göngustíga.

Það er von okkar í Garðabæ að þeir sem sækja okkur heim njóti vel af því sem bærinn okkar og fyrirtæki í honum hafa að bjóða og fari ánægðir frá okkur.