Bakkafjörður liggur suður úr Bakkaflóa. Yst við fjörðinn að austanverðu er kauptúnið Höfn, sem yfirleitt er nefnt Bakkafjörður. Höfn varð löggiltur verslunarstaður 1885. Aðalatvinna er einkum bundin við sjósókn en einnig er Bakkafjörður þjónustumiðstöð fyrir Skeggjastaðahrepp. 

Þegar ekið er ofan af Sandvíkurheiðinni í átt til þorpsins er ekið fram hjá bænum Bakka.  Á Bakka bjó "Afi á Knerri" en hann er aðalpersónan í Fjallkirkjunni eftir Gunnar Gunnarsson

Gamla bryggjan var áður eina aðstaða báta til viðlegu og þurfti að taka bátana á land eftir hvern róður vegna þess hve höfnin er skjóllítil.  Kraninn, sem þar stendur var notaður í því skyni.  Af bryggjunni má veiða þorsk, ýsu og ufsa.

Á Bakkafirði er hægt að fá gistingu í farfuglaheimili.