Fljótsdalshérað er góður kostur
Sveitarfélagið Fljótsdalshérað varð til 1. nóvember 2004, við sameiningu Austur-Héraðs, Fellahrepps og Norður-Héraðs. Fljótsdalshérað er fjölmennasta sveitarfélag á Austurlandi með um 3500 íbúa og þar af búa ríflega 2100 manns í þéttbýlinu á Egilsstöðum og í Fellabæ sem er stærsti þéttbýliskjarni á Austurlandi. Þéttbýlið styður sterk byggð í dreifbýlinu með blómleg landbúnaðarsvæði og smærri þjónustukjarna á Hallormsstað, Eiðum og Brúarási. Sveitarfélagið er mjög víðfemt og með þeim landmestu á Íslandi, það afmakast af Biskupshálsi í vestri, Héraðsflóa í norðri, Austfjarðafjallgarði í austri og Vatnajökli og Öxi í suðri.  

Fjölbreyttir búsetumöguleikar
Fljótsdalshérað býður upp á fjölda möguleika til búsetu, fjölþætta samfélagslega þjónustu og fjölskylduvænt umhverfi. Velja má um búsetu í þéttbýliskjörnunum á Egilsstöðum og í Fellabæ, í smærri þjónustukjörnum á Hallormsstað, á Eiðum og í Brúarási, eða í blómlegum sveitum héraðsins. Íbúaþróun er jákvæð, uppbygging er hröð og ný svæði í boði fyrir íbúða- og atvinnuhúsnæði.

Fjölskyldan í öndvegi
Möguleikar til menntunar á Fljótsdalshéraði eru góðir, þar eru fimm leikskólar, fjórir grunnskólar, þrír tónlistarskólar, hússtjórnarskóli, menntaskóli og góð aðstaða til fjárnáms á háskólastigi. Aðstaða til íþróttaiðkunar er mjög góð, hægt að velja um fjögur íþróttahús og þrjár sundlaugar, þar er glæsilegur íþróttaleikvangur, skemmtilegur golfvöllur og góð aðstaða fyrir hestamenn. Tvær félagsmiðstöðvar eru á Fljótsdalshéraði og kaffi- og menningarhús ungs fólks. Fjöldi opinberra stofnana hefur bækistöðvar í sveitarfélaginu og opinber þjónusta er vel aðgengileg fyrir íbúana.

Úrvalsþjónusta á krossgötum
Fljótsdalshérað dregur að sér fjölda ferðamanna árið um kring og aðstaða fyrir ferðamenn er mjög góð. Hægt er að njóta þjónustu á góðum veitingahúsum og hótelum, skoða söfn og ýmsar minjar, eða dvelja í orlofsbústað, bændagistingu eða á vel útbúnum tjaldstæðum. Á Egilsstöðum og í Fellabæ er úrval verslana með mjög gott vöruúrval og þjónustufyrirtæki sem taka vel á móti gestum. Þar liggja krossgötur mikilvægra samgönguleiða innan fjórðungs og til annarra landshluta, þar er alþjóðlegur flugvöllur og miðstöð landsamgangna. Tilvalið er að dvelja á Fljótsdalshéraði og ferðast þaðan í dagsferðir til annarra hluta Austurlands.

Blómstrandi mannlíf í hlýlegu umhverfi
Á Fljótsdalshéraði er framsækið og kröftugt mannlíf sem ber keim af sérstöku umhverfi svæðisins. Hlýlegt umhverfi og gott veðurfar mótar viðmót íbúanna og gott er að vera gestur á Fljótsdalshéraði. Þar er afar fjölbreytt og lifandi menningarlíf, öflug tónlistar-, myndlistar og leiklistarstarfsemi og fjölþætt starfsemi í klúbbum og félagasamtökum. Lifandi safnastarf býður upp á sérsýningar og ýmisskonar kynningar- og skemmtidagskrár. Fjöldi árvissra menningarhátíða er haldinn á Fljótsdalshéraði með þátttöku fjölda listamanna sem laða að fólk úr öllum landshlutum.

Fögur náttúra – fjöll og skógar
Fljótsdalshérað er rómað fyrir náttúrufegurð og gott veðurfar, sem minnir oft á loftslag á meginlandi Evrópu. Skóglendi einkennir svæðið og setur mikinn svip á umhverfi og mannlíf og fossar, vötn og ár setja svip á landið. Þar eru fjölmargir staðir vel fallnir til útivistar og margar skemmtilegar gönguleiðir hvort sem er í skógi eða fjöllum. Dýralíf er fjölbreytt og góð aðstaða til fuglaskoðunar og hreindýrin hafa mikið aðdráttarafl. Mjög víða er gott berja- og sveppaland og ferðir um nálæg fjalllendi eru vinsælar sumar sem vetur. Stangveiði er stunduð í ám og vötnum og fá svæði á Íslandi eru meira spennandi fyrir skotveiðimenn.