Akureyri - Velkomin

Akureyri er staðsett á NA- landi, við lengsta fjörð landsins, Eyjafjörð, umlukin 1000-1500 m. háum fjöllum. Einungis eru um 40 km. að heimsskautsbaug. Á Akureyri má vænta hlýrra sumardaga, þar sem hitastigið fer vel yfir 20 gráður , vetur eru snjóþungir og kaldir, en stillur og staðviðri algeng.

Staðsetning Akureyrar, svo norðarlega, hefur haft töluverð áhrif á það samfélag sem þar hefur mótast. Þrátt fyrir landfræðilega einangrun hafa samskipti við umheiminn verið mikil, fyrst í gegnum verslun, síðan útflutning og þá aðallega sjávarafurða

Talið er að landnám við Eyjafjörð hafi byrjað um 890, þegar víkingurinn Helgi magri kom þar fyrst að landi ásamt konu sinni, Þórunni hyrnu.

Saga bæjarins tengist mjög verslun og þjónustu. Verslun hófst á Akureyri á 16. öld en það var ekki fyrr en árið 1760 sem kaupmenn tóku að dvelja þar allt árið um kring. Endanleg kaupstaðarréttindi fékk Akureyri 1862 og voru íbúar þá um 300 talsins.

Akureyri er stærsta bæjarfélag utan höfuðborgarsvæðisins, með um 15.000 íbúa. Þar er mjög fjölbreytt atvinnulíf, en Akureyri er miðstöð verslunar og þjónustu á N-landi. Aðstaða til ráðstefnu-og fundarhalda er ein sú besta á landsbyggðinni.

Hlutverk bæjarins sem menntamiðstöðvar er stórt og fer vaxandi, sérstaklega eftir að Háskólinn á Akureyri tók til starfa 1987.

Menningar og skemmtanalíf er í miklum blóma á Akureyri. Má þar nefna synfoníuhljómsveit, leikhús, listasöfn, kaffi- og veitingahús og skemmtistaði. Þá er úrval verslana í bænum, er bjóða þekkt vörumerki.

Íþrótta og tómstundarstarf er einnig öflugt. Sundlaug Akureyrar er glæsileg, en hún er hituð með heitu vatni úr iðrum jarðar. Líkamsræktarstöðvar eru nokkrar í bænum, golfvellir og íþróttavellir og skíðasvæðið er eitt það besta á landinu. Akureyri má með sanni kalla paradís vetraríþróttamannsins. Á Akureyri er gott skautasvell, mjög góðar gönguskíðaleiðir í gegnum fjölbreytt landslag auk þess, sem eins og áður sagði, eru þar góðar brekkur fyrir svigskíða-og snjóbrettamenn. Þar eru haldin nokkur skíðamót á vetri m.a. alþjóðleg mót. Þá er auðvelt fyrir hópa og einstaklinga að komast í jeppa- og snjósleðaferðir.

Allt umhverfi bæjarins er mjög gróðursælt, enda ekki að ósekju að hann hefur verið nefndur græni bærinn. Innan bæjarmarkanna er að finna skógarsvæði (Kjarnaskóg) sem er vinsælt útivistarsvæði á sumrin jafnt sem veturna. Þar eru ýmsar skemmtilegar göngu- og gönguskíðaleiðir.

Lystigarðurinn á Akureyri er norðlægasti garður sinnar tegundar í heimi með fjöldann allann af plöntum og blómum, enda hefur hann vakið mikla athygli erlendra ferðamana.

Eyjafjörður, með Akureyri sem miðpunkt, er einn vinsælasti ferðamannastaður landsins. Gönguleiðir eru fjölmargar og eru margar þeirra kortlagaðar. Hestaferðir eru vinsælar, jeppaferðir og snjósleðaferðir einnig. Hægt er að komast í veiði í ám og vötnum.

Nyrsti golfvöllur heims er á Akureyri. Þar fer fram í júní, ár hvert alþjóðlegt mót er nefnist Artic Open og er fjöldi erlendra golfmanna ávallt meðal þáttakenda. Mótið hefur vakið verðskuldaða athygli erlendis, enda er leikið fram yfir miðnætti í miðnætursólinni.

Þá eru talsvert margar uppákomur á sviði menningar- og lista.

Auðvelt er að fara í dagsferðir frá Akureyri til margra áhugaverðra staða. Má þar m.a.nefna Goðafoss, Mývatn, Dettifoss, Hrísey og Grímsey en þess má geta að Grímsey liggur þvert á heimsskautsbaug.

Fjölbreyttir gistimöguleikar eru til staðar á Akureyri og í nágrenni bæjarins.

Akureyri býður upp á allt það helsta sem einungis er að finna í stærri bæjarsamfélögum, en býr samt yfir töfrum smábæjarins.

Verið velkomin.