Dalvík - Velkomin

Dalvíkurbyggð er sveitarfélag við utanverðan Eyjafjörð með rúmlega 2.000 íbúa. Það liggur vel við samgöngum á láði og legi og hefur margt að bjóða ferðafólki, jafnt um sumar sem vetur.
Náttúrufegurð á Tröllaskaga er rómuð - langir, djúpir og grösugir dalir milli hárra fjalla (1.200-1.400 m) gefa fólki kost á gönguferðum við allra hæfi yfir sumartímann og skíðaferðum að vetrarlagi. Skaginn er hreinasta ævintýraland fyrir vélsleðafólk.

Fuglalíf er geysifjölbreytt í friðlandi Svarfdæla og úti á Eyjafirði er stutt að fara vilji menn renna fyrir fisk. Reyndar er óþarfi að fara á sjó í því skyni því í Þorvaldsdalsá, Svarfaðardalsá og Hrísatjörn eru ágætis silungsveiði. Og á haustin verða fjallshlíðarnar dökkar af berjum.

Atvinnulífið í Dalvíkurbyggð stendur með blóma. Það er blanda af hefðbundnum greinum - landbúnaði og sjávarútvegi - og nýtískulegum iðnað.

Mennta- og menningarlíf er öflugt því í sveitarfélaginu eru góðir skólar, virkt og metnaðarfullt leikfélag, landsfrægur kvartett og ekki færri en fimm kórar, að annarri tónlist ógleymdri.

Á Dalvík er byggðasafn þar sem gefur að líta ýmsa muni sem tengjast sögu héraðsins. Í einni deild safnsins eru fjölmargir fuglar og dýr, þeirra á meðal ísbjörn, sem Steingrímur Þorsteinsson stoppaði upp. Auk þess eru þar deildir sem helgaðar eru minningu tveggja þekktra Svarfdælinga, þeirra Kristjáns Eldjárns forseta og Jóhanns Péturssonar Svarfdælings en hann mun vera stærsti Íslendingur sem uppi hefur verið.

Í Dalvíkurbyggð er hægt að njóta margvíslegrar þjónustu. Þrjú bílaverkstæði, bensínstöðvar, veitingahús, handverksgallerí, apótek, heilsugæslustöð, áfengisverslun, sparisjóður, hárgreiðslustofur, matvöruverslanir, prentsmiðja og þannig mætti áfram telja.

Ýmsir möguleikar eru á gistingu, tjaldstæði, bændagisting og gistiheimili sem sum hver eru opin allt árið.

Ferðafólk sem sækir Dalvíkurbyggð heim getur valið um margs konar afþreyingu og útivist. Góð íþróttamannvirki eru á Dalvík, íþróttavellir, hlaupabrautir og nýleg sundlaug. Í fjallinu ofan við bæinn er fólkvangur þar sem gott er að vera á sumrum og á vetrum er þar eitt af betri skíðasvæðum landsins með brekkum fyrir byrjendur jafn sem meistara og troðnar brautir fyrir skíðagöngufólk.

Í Svarfaðardal er níu holu golfvöllur á fögrum stað við ána. Þar er einnig elsti yfirbyggði sundskáli landsins og íþróttahús eru við alla skóla sveitarfélagsins: á Dalvík, í Árskógi og á Húsabakka í Svarfaðardal. Það er einnig hægt að bregða sér í sjóferðir frá Dalvík og Hauganesi, skoða hvali, renna fyrir fisk eða bara njóta sjávarloftsins og útsýnisins. Frá Árskógssandi er haldið uppi reglulegum siglingum milli Hríseyjar og meginlandsins og frá Dalvík siglir ferja til Grímseyjar.

Þeir sem koma til Dalvíkurbyggðar að sumarlagi ættu ekki að sleppa því að aka út í Ólafsfjarðarmúla að kvöldlagi því óvíða gefur að líta fegurri miðnætursól. Hún rennir sér niður undir hafflötinn, lyftir sér aftur og litadýrðin er ólýsanleg.