Siglufjörður er nyrsti kaupstaður á Íslandi og ber enn svipmót þess að hafa verið höfuðborg síldarinnar um 
langt skeið.  Íbúar eru um 1700 og sækja aðalega lífsbjörg sína til hafsins.  Þar er rekin blómleg togaraútgerð og margir hafa atvinnu af rækju og loðnuvinnslu.  Ferðamenn finna þar flest sem þeir þarfnast, sundlaug, bensínstöð, verslanir, matsölustaði og gistiþjónustu.  Tjaldstæði eru syðst í bænum.  Nyrsti skógur á Íslandi er nokkru innar í firðinum, þar sem njóta má fagurs útsýnis á skjólsælum stað.  Fjölbreytilegar gönguleiðir liggja um Siglufjarðarfjöll og má þar nefna Hvanneyrarskál þar sem er gott útsýni yfir bæinn og allt til Grímseyjar.  Einnig skal bent á Hestskarð (580m) sem er skemmsta og auðfarnasta leið gangandi folks til Héðinsfjarðar.

Árið 1903 urðu mikil tímamót á Siglufirði er Norðmenn hófu stórfelldar síldveiðar við Norðurland og gerðu Siglufjörð að miðstöð síldarútvegsins. Með síldveiðunum og nýrri tækni til botnfiskveiða, togaraútgerðinni urðu stórstígari framfarir en nokkurn tíma í sögu Íslands. Þjóðin steig út úr aldalöngu myrkri og fátækt til nýs tíma með rafljósum og tækniframförum á öllum sviðum.

Árið 1994 var opnað á Siglufirði safn til minningar um þennan stórkostlega tíma í sögunni. Síldarminjasafnið er landssafn um sögu síldarútvegsins á Íslandi.

Síldarævintýrið er útihátíð sem haldin hefur verið um verslunarmannahelgar frá árinu 1991. Þúsundir gesta hafa heimsótt Siglufjörð hverju sinni þar sem menn gera sér glaðan dag í anda síldaráraannaþar sem heimamenn flytja fjölbreytileg skemmtiatriði - allt heimafengið.