Vatnsleysustrandarhreppur tengir byggðirnar á höfuðborgarsvæðinu við byggðirnar á Reykjanesinu. Strandlengjan í hreppnum er um 30 km löng. Vatnsleysustrandarvegurinn, um 12 km langur, merktur þjóðvegur 421, liggur í hreppnum, hann er lagður bundnu slitlagi og tilvalinn fyrir þá sem velja vilja minni og hægari umferð en ef ekið er eftir Reykjanesbraut.
Náttúrunnendum er sérstaklega bent á Vatnsleysustrandarveginn því í Vogum eru fallegar tjarnir og klettar og töluvert um fuglalíf. Vogastapi, Vogatjörn, Kálfatjarnarkirkja og Staðarborg eru meðal þess sem ferðamönnum er ráðlagt að skoða.
Þeim, sem vilja dvalja lengur en daglangt og njóta af því sem náttúran, fyrirtæki og hreppurinn hafa að bjóða, er bent á að í Vogum er ný og glæsileg sundlaug með heitum pottum, gufuböðum ofl. Við sundlaugina er tjaldstæðið í sléttri og fallegri laut.