Mannlíf í Grindarvík hefur fremur öðru einkennst af baráttunni við hafið, margar sögur eru þar um samanber bók séra Gísla Brynjólfssonar, Mannfólk mikilla sæva. Í dag er Grindavík einn öflugasti útgerðarstaður landsins, hér hefur mikil gróska verið einkennandi síðustu áratugi. Fram á þessa öld voru landbúnaður og fiskveiðar stundaðar jöfnum höndum en nú hafa þau umskipti orðið að hefðbundin landbúnaður er horfinn en iðnaður og þjónusta komið í staðinn.

Saga Grindavíkur er viðburðarík og sviptingamikil samanber Tyrkjaránið 1627 -en þó einkum á 15. og 16 öld meðan hörðust var samkeppni Englendinga og þýskra Hansakaupmanna. Þótt sjávarsókn sé brauðfæði í Grindarvík er ferðaþjónusta mjög áberandi og ört vaxandi. Fjöldi veitingahúsa og nokkur gistihús eru í Grindarvík og gott tjaldstæði. 

Hitaveita Suðurnesja eitt fullkomnasta orkuver landsins er í landi Grindavíkur. Í tengslum þar við hefur á síðustu árum risið einn öflugasti þjónustustaður ferðamanna í landinu Bláa Lónið. Grindavík hefur auk þess upp á fjölmargt annað að bjóða fyrir ferðamenn. Göngufólk mun vissulega finna leiðir við hæfi hvort heldur gengið er á fjöll eða á láglendi.
Suðurströndin er lítt kunnur undraheimur, þar verður samspil tóna og lita stórfenglegt.

Eldfjöll, hraun, leirhverir og vatnshverir eru víða og víst að þeir sem áhuga hafa á jarðfræði skortir ekki rannsóknar og athugunarefni á svæðinu. Verið velkomin til Grindavíkur og njótið vel þess sem staðurinn og fyrirtæki í honum hafa að bjóða.