Velkomin til Árborgar - Selfoss

Selfoss er miðstöð verslunar og þjónustu á Suðurlandi. Selfoss varð sérstakt bæjarfélag 1947 og heldur því upp á 50 ára afmæli sitt á þessu ári ,af því tilefni er sérstök afmælisdagskrá í sumar.Fjölbrautaskóli Suðurlands á Selfossi er starfræktur í samvinnu sveitarfélaga á Suðurlandi . Bæjar- og héraðsbókasafn Árnesinga er á Selfossi. Lista- og dýrasafn Árnesinga hefur aðsetur á staðnum. Góð íþróttaaðstaða er á Selfossi. Íþróttahús er við Sólvallaskóla og sunnan Engjavegar er víðáttumikið útivistarsvæði með íþróttavöllum. Þar er einnig risin myndarleg gistihúsabyggð, auk þess sem tjaldsvæði Selfoss er rekið í tenglsum við hana. Aðsókn ferðamanna á tjaldsvæðið hefur aukist stöðugt hin síðari ár. Við Svarfhól skammt austan Selfoss er glæsilegur 9 holur golfvöllur á bökkum Ölfusár. Tilvalið er að fara gönguferðir með ánni. Einnig er Ingólfsfjall kjörið uppgöngu og sést þaðan vel yfir sléttur Suðurlands, fjallahringinn í norðri og austri, og til Vestmannaeyja í suðri. Selfoss er samgöngumiðstöð Suðurlands. Þjóðvegur nr.1, eða hringvegurinn sem svo er nefndur, liggur í gegnum bæinn og fara því margir ferðamenn þar um. Frá Selfossi liggja vegir í allar áttir. Áætlunarferðir eru frá Selfossi til allra átta. Má þar nefna að Gullfossi og Geysi, í Þórsmörk og Landmannalaugar, til Akureyrar og austur á land og niður að ströndinni til Stokkseyrar, Eyrarbakka og Þorlákshafnar. Aðgengilegar verslanir fyrir ferðamenn eru á Selfossi. Þar er einnig starfrækt hótel, ásamt gistiheimilum auk áður nefndrar gistihúsabyggðar við tjaldsvæðið og svefnpokagistingar í Sólvallaskóla á sumrin.Í sumar var tekin í notkun nýtt og glæsilegt útivistarsvæði við Sundhöll Selfoss þar má finna barnalaug, rennibraut, leiktæki ýmiss konar, eimgufubað við laugarbakkann og heita potta.
Ferðaþjónusta er einn aðalatvinnuvegur staðarins og víst að ferðalangur verður ekki svikinn af heimsókn til Selfoss.

Heimasíða Selfoss er á slóðinni:  http://www.selfoss.is

Karl Björnsson
bæjarstjóri
heimasíða