Velkomin til Borgarbyggðar

Borgarbyggð varð til árið 1994 við sameiningu Hraunhrepps, Stafholtstungna, Norðurárdals og Borgarnes. Í ár bætast við Borgarhreppur, Þverárhlíðarhreppur og Álftanesshreppur.

Sveitarfélagið er miðstöð stjórnsýslu í Mýra- og Borgarfjarðarsýslu,hér er rekinn talsverður iðnaður, bæði vinnsla landbúnaðarafurða sem og byggingariðnaður. Borgarbyggð og þá sérstaklega Borgarnes verður æ þýðingarmeiri sem þjónustumiðstöð ferðamanna sem heimsækja Mýra- og Borgarfjarðarsýslur. Hér er í boði öll almenn þjónusta svo sem banka- póst- lögreglu- og heilbrigðisþjónusta.

Mikil uppbygging á sviði ferðaþjónustu hefur átt sér stað síðustu ár í Borgarnesi og víðar í Borgarbyggð. Í Borgarnesi er stórt hótel með góðri aðstöðu til ráðstefnuhalds. Þá er í Borgarnesi innisundlaug, ný útisundlaug með gufubaði, eimbaði og heitum pottum. Aðstaða til frjálsíþróttaiðkunnar er frábær sem og góður knattspyrnuvöllur. Borgarnes er því kjörinn staður fyrir einstaklinga og hópa sem þurfa að komast í æfingabúðir. Veitingaaðstaða er margvísleg og ýmist skemmtun og uppákomur í gangi ef ekki í Borgarnesi þá í félagsheimilum á svæðinu.Góður golfvöllur er rétt utan við Borgarnes.
Borgarnes byggðist úr landi Borgar á Mýrum. Í Egilssögu er það nefnt Digranes. Hér rak á land kistu Kveld-Úlfs, föður Skalla-Gríms og samkvæmt sögunni varð það til þess að Skalla-Grímur byggði bæ sinn að Borg. Innan bæjarmarka Borgarness eru nokkur örnefni sem tengjast Egilssögu, s.s. Kveldúlfshöfði og Kveldúlfsvík, enn fremur Skallagrímsdalur, Brákarsund o.fl.

Við bjóðum gesti okkar velkomna til Borgarbyggðar. Vonum að þeir eigi ánægjulegar stundir með okkur hér í Borgarbyggð.

Please mail to webmaster@travelnet.is
if you have any comments or questions about this website.
Copyright 1997-2003 Travelnet.is