Velkomin til Grundarfjarðar

Grundarfjörður er kauptún í Eyrarsveit, fyrir botni Grundarfjarðar. Siglingar munu hafa verið frá fornu fari enda besta höfn á Snæfellsnesi frá náttúrunnar hendi og verslun hófst þar snemma. Grundarfjörður hlaut kaupstaðaréttindi árið sem verslunin var gefin frjáls 1787, þó svo að ekki varð neitt þéttbýli að ráði strax.

Um aldamótin 1800 fengu Frakkar aðsetur í Grundarfirði og byggðu sér meðal annars sjúkraskýli og kirkju en tóku þó uppaðstöðu sína um 1860.

1836 voru kaupstaðarréttindin tekin af Grundarfirði en staðurinn löggiltur sem verslunarstaður áfram. Árið 1897 var verslunarstaðurinn fluttur í Grafarnes, líklega af hvötum Norðmanna, sem hugsuðu sér gott til glóðarinnar með hvalveiðum. Af því varð nú ekki en verslunarstaðurinn var kjurr.

Þótt verslunarstaðurinn væri fluttur 1897 var fyrsta húsið ekki byggt fyrr en 1906, svokallað Neshús. Raunveruleg þéttbýlismyndun hófst ekki í Grundarfirði fyrr en um 1940 en þá var byrjað á hafnarbótum með því að lengja bryggju er þar var. Á þessum árum var einnig hafinn undirbúningur að Hraðfrystihúsi Grundarfjarðar hf. en það var stofnað 1941 og var hver verkfær maður í sveitinni með eitthvert hlutafé. 1962 var Kaupfélag Grundarfjarðar stofnað og tók það við eigum Kaupfélags Stykkishólms er var þar fyrir með eignir. Hefur fólki fjölgað jafnt og þétt síðan, með vaxandi útgerð.

Árið 1965 var ákveðið með almennri atkvæðagreiðslu í Eyrarsveitað að festa nafnið Grundarfjörð við staðinn. Kirkja var vígð þar 1966 en hafði prestur setið þar frá 1963. Þar er einnig heilsugæslustöð, samkomuhús er var reist á árunum 1945-1950, landsímastöð hefur verið frá 1944 auk þess allmikið félagslíf sem samanstendur af flölmörgum hreyfingum og klúbbum.